أسبوع مرولا وصل منك مرسال
يا قو قلبك كيف تقطعني أسبوع
الجوع كافر وأنت ما ترحم الحال
وأنا عليك من الوله ميت جوع
ياللي غيابك صعب يطري على البال
تركتني ضايق وحاير ومفجوع
ما كني الا شايب فاقد عيال
وما كنك إلا محرم حق مشروع
يفوع لك قلبي ليا مر الأطلال
ياليت مالي قلب يشتاق ويفوع
حسبي عليك اشلون قطعت الآمال
بمووت لاصار الأمل فيك مقطوع
يا صاحبي ما كل نزّال رحّال
انت الحيا من وين مارحت متبوع
نسياني الزول بالأعماق يختال
أصعب على صاحبك من حبة الكوع
لو الثمن في شوفتك عمر رجال
كان الثمن من يوم ماغبت مدفوع
ولو القدر ما تم قوله ليا قال
ما ضاق صدر ولا انحنا راس مرفوع
يا صاحبي عشقتني فعل وأخصال
وأنا عشقتك شعر وأحساس وأطبوع
وشلون تتركني كذا لاشها بلال
وقدام عيني تجف ينبوع ينبوع
وأنا عشانك جيت والغيم همال
أسيل الوديان وداحم جموع
ما ردني عنك سواليف عذال
تزعل علي ربوع واتقدر ربوع
كان المهم أعيشك جنون ووصال
ويكون لي كلمة ولي راي مسموع
واليوم ضاقت بي من الجال للجال
فرقاك تقسم ظهر وتحز وتلوع
لوجيت شفت الحال ما سرك الحال
في غيبتك ضايق وحاير ومفجوع
هاذا غياب أسبوع وشلون لوطال
اطالبك لا يطول غيابك عن أسبوع