عمل هوية مزورة للفيس بوك بدون فتوشوب

  كلمة لا هي حق من حقوقك كيف تكون عندك المقدرة على الرفض وقول كلمة لا ..

 قبل هالشيء لازم يكون عندك اسلوب جميل في انك تقولها بحيث انك ماتقلل من احترام الشخص الي طلبك .. حاول تقول لا ، بطريقه تبدي فيها تعاطفك معه .. ...

 بالبداية ما اخفيكم اني من اكثر الناس الي تعاني من عدم المقدرة على قول لا .. اصلا اكثر انسانه كانت فاهمة كلمة لا غلط هي انا لاني كنت أظن ان الي يقول لا هو شخص غير متعاون او سلبي ..

 وطبعا انا ابغا اثبت العكس .. انا اكثر انسانه تستصعب الرفض مهما كان الطلب (( طبعا لو الشخص عزيز علي يعني لاتحسبوني كلمه توديني وكلمه تجيبني ))

 خليني اضرب لكم مثال بموقف بسيط صار معي .. في الدوام خلصنا شغلنا بدري .. وخلاص بنمشي بيوتنا .. جاتني موظفه الامن تقول لي فلانه تبغاك توصليها معك ..

 انا طبعا كعادتي السيئة تقوم فيني النخوة والشهامة وهالشيء غلط انك تخليه على مر الاوقات يعني لازم ان كان فيك صفات جميله ماتروح تبزرها لمن هب ودب .. انا وقتها وافقت ع هذا الطلب الصعب ... كنت المفروض ارفض .. قولوا ليش ؟؟ في اسباب كثير ..

 انا كنت جديدة على القيادة .. اخاف امشي اماكن ما ادلها الا عن طريق الجي بي اس .. وامكانياتي ماتسمح لي افتح مجال توصيل اي وحده سواقها ما يجي الا ع الاقل تعبي لي بنزين .. وغير كذا ابغا زيي زيها ارجع البيت بدري واجلس مع عيالي .. ولكن قلت خليني اوديها بلاش نخذلها .. ممكن بوقت ترد لي هالجميل في وقت انا احتاجها فيه واقلها تعبي لي بنزين .. في نفس اليوم كنت معطية بنتين غيرها كلمة اني ارجعهم بيتهم بناء على طلبهم .. 

 (( ميما .. نبغاك توصلينا لان لما نخلص شغلنا بدري سياراتنا ماتجي بسرعة .. ونحن ويكند مانبغا نضيع الويكند ننتظرهم )) ‏ 

طيب انا مثلكم ما ابغا ويكندي يضيع !! مافكرت بهذه الطريقه .. فكرت في هوايتي الغبية والي هي .. الفزعة .. انا ماكنت مستوعبه اني لما اكون ايجابية معهم في طلب اناني مثل هذا راح اكون سلبية بحق نفسي .. تخيلوا ثلاث بنات لازم ارجعهم بسيارتي على بيوتهم .. 

وكل بيت مو على طريق البيت الي قبله .. وانا مبتدأه..

 ووحدة فيهم مصرة ان عندها موعد حكومي مع اني وضحت لها ان اليوم جمعة ومافي دواير حكومية ..

 بس لما وصلتها وبغيت امشي دقت علي ارجع لها لانها تاكدت اخيرا انهم مايفتحوا يوم الجمعة .. اضطرتني ارجعها بيتها .. لو وقتها من بدري قلت لهم لا .. كنت قمت بحقي الطبيعي تجاه نفسي .. وماكنت تعبت نفسي كل هذا التعب عشان أرضاء شوية مستغلين لا اكثر .. 

راح تقولولي حرام وانتي تحرضي على عدم التعاون او البخل بالمساعده .. لا لا .. فقط اوزنوا بين كلمه نعم ولا .. لان هالشيء مثبتة دراساته .. ان قول كلمة لا اخف على النفس اكثر من نعم ... لاني لو قلت لهم لا .. كان حافظت على بنزيني .. كان رجعت مثلهم البيت بدري .. ياجماعة ولا وحده فيهم عبت لي بنزين لو بريال .. الي قالوه لي شكرا .. هم وصلوا بيوتهم بدري في حدود الساعة ١ وانا وصلت ٣ ونص الظهر .. لما داومت بعد ذاك الموقف وحده فيهم سلام الله ماسلمت علي .. بس لما احتاجتني بالتوصيل كنت حبيبتها ..قلت لنفسي تستاهلي لان مثل هالموقف يعلمني ابدل كلمة نعم بلا في المرات القادمة .. ماعلينا طولت بسرد القصة هذه.. بس حبيت اوضح لكم واحد موقف من المواقف الي لما ماتقول لا ايش النتايج ..

 لا تستصعبوا كلمه لا لو كان فيها محافظة على حقوقكم وتسد طريق الاستغلال عن الناس مثل هذول الي يستغلون خوفك من كلمة لا بيعاملوك مع الايام معاملة المجبر على تنفيذ احتياجاتهم .. وبالتالي

 بتكون معرض للاستغلال ..

 الحل بسيط .. لا .. 

 في اشكال كثيرة لكلمه لا .. مثل ما اقدر .. او عندي ظروف مع ذكر كلمة اسف من باب تلطيف الاجواء .. وهذا حيكون ذوق منك ولا الاصل انت مو مجبور انك توضح اسباب رفضك فيا عزيزي وعزيزتي .. كلمة لا هي مهارة وهي قدرة مو الكل يقدر يقولها .. لازم تتذكر ان قولك كلمة لا بحدود الادب والمعقول هي مكسب حقيقي لنفسك .. ابدا لا تجعل اولويات غيرك قبل اولوياتك .. ولازم يتغير تفكيرنا الي ينص على انه قائل كلمة لا يعتبر شخص مذموم .. هو فقط انسان حط حد لاستغلال شوية متطفلين في حياته يبغون يستغلون خوفه من الرفض وتقديسه لمشاعر غيره .. تذكر انك لو رفضت انك تقوم بامور منت مجبر عليها هذا يدل على ثقتك بنفسك وتقديرك العالي لها ..