وش الي ينتظر رندا في فيلا الدكتور مازن حمدان ....
هالمكان الكبير والجميل والفااااخر والغريب ، والي رندا صارت عايشه فيه !!! على كبره لكنه كان صغير وضيق جدا في نظر رندا ، موووحش هذا الإحساس الي تحسه وهو ( الغربة )
( انا غريبه وفي مكان غريب وفي ظروف غريبه وزمن غريب ، يااااه وش الي قلب حالي وغير مجرى حياتي ،، ياترى لو ماهربت وش الي كان صار لي ؟؟ سؤال راح تظل رندا تسأله لنفسها كل ماحست بالغربه والوحشه )
كانت واقفه في البلكونه تطل على المسبح والشلال الي مسوينه في حديقه الفيلا ، مع الأشجار الخضرا وريحه الورد الي تعطي للإنسان دفعه امل مشرقه وراحه نفسيه ، ومع هذا كله كان احساس رندا الداخلي هو ( تعاسه الغربه ) !!
اتنهدت رندا بحزن ويأس : ماكنت ادري ان حياتي في اقل من خمسه شهور بيتغير مسارها بهالطريقه هذه ،، واهرب من اهلي واترك وراي كل هالغموض والتساؤلات !! بعمري ماتوقعت اني بكون خدامه في البيوت !
مسحت دموع ساخنه حرقت خدودها ، تذكرت نبره بسمه معها ونبره ام مازن ، والألعن من كل هذا هي طريقه مازن بالشفقه عليها !!
خرجت مذكراتها وانغمست في الكتابه فيها ,,
آه من هم الفراق وعيشة الغربة
آه من برد الشتى واشواق وجداني
يا زمن عود بساعة طالبك طلبه
لين اجاوب يا زمانِ فنجاني
جاء يصارع للوصل ظروفه الصعبه
جا يبي يسعف خفوقِ طاح ضمياني
وقلبي اللي من فقدته مشعلِ حربه
كل ما سجيت عنه قام ينخاني
مسحت دموعها وبمكابره كبيره قالت لنفسها : بتوضى واصلي الفجر واحاول انام من جديد ، من طيحتي اول امس بالمستشفى للحين ما احس اني ارتحت ، لسه جسمي كله يآلم !!!
=====
في الصباح فزت رندا مرتعبه من صوت الباب وهو يدق ،، كأنها قنابل !!!
رندا : شكله صاير شيء اعوذبالله ماني ناقصه قلق !!!
قامت وفتحت الباب ولقت بسمه في وجهها ،،، وارتبكت بقوة وقالت : هلا هلا ام شوق ،، صاير شيء ؟؟؟؟
وردت عليها بمسخره : لالاحبيبتي مو صاير شيء بس كل مافي الموضوع ان شوق محد صحاها وفطّرها ووداها للمدرسه !!!! ليكون في بالك انك جايه هنا تنصمدين لنا مثل العروس ؟؟؟؟
رندا : لا العفو بس الدكتور مازن قال لي من تسعه الصبح ابدأ شغل ولو ادري بتعتمدين عليفي امر المدرسه كنت صحيتها وفطرتها وماسويت الا اللي يرضيك !!!
طريقه كلام رندا بإنكسار حفزت بسمه على الغطرسه وشوفه النفس ،، ردت عليها بدون نفس : اهااااا ، اوووك لاعاد تعيدينها ،، والا طردك من هنا راح يكون على يدي !! من الأساس انتي واقفه في حلقي وموجوده غصب عني بس مازن يحب يساعد المساكين والمتشردين فماحبيت اني اوقف ضد عمله للخير !!!
حست رندا بالإهانه وردت بسرعه : مستعدة اترك لك البيت لو تبين ومن الحين يا اخت بسمه !!!!
قالت لها بتهكم : ياليت ياعمري تسوين فيني معروف ، ماني طايقه وجودك ابدااا ، ويله لمي اغراضك ومع السلامه !!!
قالت لها رندا بجديه وتحدي : ابشري .....
طلعت رندا دفتر مذكراتها من الدرج والبجامتين الي جابتهم معها وحطتهم بشنطتها وناظرت في بسمه الي كانت تتابع وهي حاسه بالنشوة والشماته ...
رندا : يله مع السلامه !!!
بسمه : اسري يله ولاتضيعين وقت ،، واقفلي الباب وراك ...
انتصرت رندا لنفسها من هالنسرة ، حست بشوية قوة لأنها ماسكتت لبسمه ولأنها تغلبت على سلبيتها ،، ولكن هالراحه امتزجت بشويه قلق يوم قررت تغادر ،،
ولكنها تنشد الراحه من وجع الراس الي تسويه بسمه والقلق الي راح يجيها من الضياع الي بتشوفه بخروجها من هنا ,
وهي بالحديقه وقبل تخرج من الباب لمحها مازن الي كان هو بعد بالحديقه يشرب الشاهي ويقرا جريده ، ناظر وهو يتأكد ،، معقول هذه رندا بتمشي من الحين ؟
قام من مكانه مسرع وهو ينادي : رندا ،،، يارندا ،،، اصبري وين بتروحين ؟؟؟؟
رندا : ولا شيء دكتور مازن خلاص صار وقت اني امشي احس اني تحسنت خلاص
مازن : رندا وش صار ع اتفاق امس ايش فيك ؟؟ مو اتفقنا تقعدين مربيه للبنات ؟؟
ردت رندا وهي تدمع : ايه مربيه مو ممسحه لزوجتك ؟؟؟ الحين ماخلت وبقت فيني سمعتني كلام مثل السم وطردتني !!!
مازن : بسمه طردتك ؟؟؟؟؟؟
رندا : ايه ماتبيني في بيتها !!!! والشغله مو غصب !!
مازن بتحدي : لو رحتي من هنا انا ابطردها وراك ، ماتعودت حرمه تكسر كلامي ،،
خافت رندا وحست انها بكلامها لمازن فتحت على نفسها ابواب ماراح تتقفل وزادت الطين بله ، وقالت له وهي قاصده الهروب من الي ممكن يصير : دكتور مازن تكفى خليني اروح مالك شغل فيني ...
مازن : اتركك لمنوو ؟؟؟ لسعيد ولا ابوك يذبحونك وانا قادر اني احميك !! يله يله ولا يكثر !...
دخل مازن البيت ورندا قدامه ولقي بسمه جالسه تتفرج تلفزيون ،، وقف قدامها وقال لها : ليش سويتي كذا مع رندا ؟؟؟؟
طالعت فيه ببرود : وش سويتلها ؟؟؟ ماسويت لها شيء ؟ كل مافي الموضوع اني ما ابيها في بيتي وخلاص ، انا حره !....
مازن وهو حابس غضبه : اوووكي يابسمه لو ماتبغيها عندك بيت ابوك وش كبره روحي له واجلسي فيه الييييييين تقتنعين بكلامي .....
اتفاجأت من زوجها الي ماتعودت منه انها تسمع كلمه لا .. قالت له : متأكد من كلامك !...
مازن بثقه : وماعندي غيره ....
بسمه : راح تندم يامازن !...
وطلعت بسمه تبي تلم اغراضها وتمشي وبهالوقت كانت رندا تترجاه يمنع هالشيء ويتركها هي الي تمشي ،
رندا : يادكتووور تكفى انا مو بخرابه بيوت ، لا تخليها تمشي دكتور بليز !.....
صرخ عليها : رندا لاتتدخلين في مشاكلنا ممكن ؟؟؟ انا سويت هالشيء عشان تبدأ تتعود انها تسمع كلامي ، دايما كلمتها هي الي تمشي في هالبيت وانا ماغير اقول لها ايه وحاضر ، لكن يوم جيت ابعتق رقبه من الذبح والموت توقف بوجهي !.....لا هالمره مابسمع كلامها !...
نزلت بسمه وهي شايله شنطه ملابسها ومعاها البنتين وقالت لزوجها قدام البنات ( بقصد انها تخليهم يكرهون ابوهم ) : يله يامازن ارتاح ، انا ابسوي الي يريحك واترك البيت لك ولهالمتشرده واروح لأبوي ،، موهذا الي تبيه اني امشي من هنا ، هذاني بسوي الي تبيه ، انبسط !...
كانوا شوق وحنين يناظرون في ابوهم بحزن وهو لاحظ هالشيء ، وحس للحظه انه تسرع بكلامه لها لكنه كابر عن الإعتذار وطلع مكتبه وتركهم كلهم !.... والي يصير يصير !...
وبهاللحظه تقدمت بسمه من رندا وناظرت فيها بحقد ماعمرها شافت مثله !...
رندا : اختي والله مــا قصدت اني اقـ ........ >>>>> ولا تتفاجأ رندا بصفعه قويه على وجهها !...
وش الي يصير فيني ياناس ؟؟ صرت ملطشه للي يسوى والي مايسوى ؟؟ تضربني هالحقيره القذره الحاااقده لييش
رندا : ليش تضربيني ليــــــــــــــــــش ؟؟؟؟
بسمه : يله ارتاحي الحين بعد ماخربتي بيتي ،،،،،،،،،، يله يابنات مشينا !...
انصدمت رندا بقوووة ،، لأول مره احد غير ابوها يضربها ، ماعمرها صاااارت ...! وش هالإهاااانه المشينه ؟ اااااخ يالقهر ، ماتقدر رندا ترد عليها الصاع بعشره ، وضعها المزري في البيت مايسمح !...
- ياربي وش اتحمل ووش ما اتحمل ،، كثير هذا ياربي ..
وطلعت غرفتها وقفلت على نفسها الباب !...
=========
يوووسف قووووم خلاص كفايه نوووم !.....
هالكلام قالته وفاء لزوجها بدلع ، تأخروا بالسهر وصار العصر وهو لسه نايم ومن المفترض ان طيارتهم بعد العشا على فينيسيا !...
ناظر يوسف بالساعه في تكاسل ويوم شافها صارت اربع ونصف فز من المخده وقال لوفاء بخوف : جهزتي الشنط ؟؟؟؟
وفاء : ايه جهزتها كل شيء جاهز مابقي غير تاخذلك شور ونروح للمطار !....
يوسف : حلو حلوو ، يله الحين اقوم بس جهزي لي حاجه اكلها ميت من الجوع ....!
وفاء : يخسا الجوع الحين بعد ماتخرج من الحمام بتلقى احلى سفره 
يوسف : الله لايحرمني منك يافوفو عسى ربي يسعدك مثل ما انتي اسعدتيني
ابتسمت له بخجل وهي ترتب السرير وعيونه مافارقتها ، اخذ نفس عميق من ليحس بالسعاااده الي تسكن قلبه وهو جنب الإنسانه الي حبها
واخذ منشفته وطبع قبله على جبينها ودخل الحمام .
=======
وفي المستشفى جا اتصال لمازن على جواله وكان المتصل هو ابو زوجته ،، ناظر في الجوال وقال : اجل عمي الحين دري بالموضوع ، تستعينين بأبوك يابسمه لتنتصرين علي وتمشين كلامك مثل كل مره ، تخسين في وجهك معاد اسكت لك !!
وفتح الخط : هلا عمي ،،، معليش تتصل بي بعد الساعه 9 لأني بالدوام ومشغول !...
ابو بسمه : افااا يامازن افاا ...! ماتوقعتك تهدم بيتك عشان خدامه ؟؟؟
مازن : ياعمي ياحبيبي مارميتها ولا شيء هي الي تركت البيت.....!
مازن : ايه تركته لأنك خيرتها بين البيت ورندا او تمشي ؟؟؟
ابو بسمه : بالله هذا كلام ياولدي ؟؟
مازن : عمي انت رجل حق وتخاف الله ، ولو عرفت ليش انا ابي هالبنت في بيتنا ماكنت تلومني كذا وكنت اصريت اكثر مني انها تظل بيننا ...
ابو بسمه : يوووو لهالدرجه ؟؟؟
مازن : واكثر بكثير ، وانت ياعمي تثق فيني وتدري اني ما اتصرف الا بكامل وعي ولكن قصه هالبنت سر مقدر اقوله لكن خليك واثق انها في بيتنا حمايه لها مو نستعبدها مثل ماسوت بسمه !!!
ابو بسمه : اهااااا ، اجل كذا الموضوع ؟؟؟
مازن : ايه ياعمي ولازم انت تفهم بسمه انها تتعلم تحترم قرارات زوجها وماتعصي كلامه لأنها زودتها وانا معاد اتحمل ؟؟؟؟
ابو بسمه : لالا ياوليدي مالك الا طيب الخاطر وبنتي ان شاء الله ابكلمها ومايصير الا الخير
مازن : يجزاك خير و مع السلامه
ابو بسمه : مع السلامه !!!!
قفل ابو بسمه الخط وناظر في بنته وقال لها : وش كنتي مسويه مع هالخادمه ؟؟؟
بسمه : شرشحتها لأن بنتي ماراحت المدرسه بسببها .؟
ابو بسمه : احب الفت نظرك ع شغله يابنتي ؟؟؟ مازن يقول ماجابها خادمه وان عينها كذا ليكون لها صفه وخروجها من البيت خطر على حياتها ...!
ابو بسمه : قال لي هالكلام وماصدقته يبه ، احس في براسه موال وخايفه منه ....!
مازن : بسمه كلنا نعرف ان مازن رجال حكيم وفاهم ومايتصرف شيء الا يكون دارسه وفاهمه صح !! ولا ماكان رجل ناجح وله مكانه بين الناس .
بسمه : يا ابوي ياحبيبي افهمني ، البنت حلوة ،، وش الي حلوة ....! جمالها ملائكي ،،، احلى مني بكثير يبه وانا خايفه على زوجي منها ، خايفه تخطفه مني ...!
ابو بسمه : هههههههههههههههههههههههههههههه
بسمه : وش يضحكك يبه هذا وقت ضحك ؟؟؟؟
ابو بسمه : انتي تصدقي ان مازن الرجل العملي والجدي ؟؟؟ ممكن يطالع في بنت مثل هذه وظروفها بهالشكل مهما كان جمالها ... ؟؟؟؟
بسمه : الشيطان شاطر يبه ....
ابو بسمه : يابنتي قومي ،،، قومي وجيبي بناتك خليني اردك بيت زوجك وعن التصرفات الطفوليه ، مازن مافيه مثله اثنين !! لاتضيعينه وتخسري كل شيء !
بسمه بعد برهة صمت : اااااااااااااااه يبه ، امرك ، وهالمره لجل خاطرك رديت ، بعد كذا لابيشوفني ولا بيشوف بناته !..
ابو بسمه : يله يله ان شاءالله بعد كذا مافي مشاكل ومافي الا كل خير!!
وش الي منتظر رندا من هالإنسانه الحقودة ....؟؟؟؟؟ تاااابعونا في البارتات القادمه